Ribadumia. Pazo Quinteiro da Cruz. Ruta das camelias

Ribadumia

Sobre este patrimonio

O pazo Quinteiro da Cruz está situado no val do Salnés, na parroquia de Lois, no Concello de Ribadumia. A finca ten unha extensión de 7 hectáreas, a metade está destinada ao cultivo de albariño. O pazo é do século XVIII e consta dunha casa orixinal cun gran patio interior, a adega onde se elabora viño albariño da propia finca, que se comercializa coa marca Quinteiro da Cruz", D.O. Rías Baixas, o alpendre porticado de columnas de pedra, no cuxo interior se atopa unha antiga lareira, lagar e aperos de labranza (catalogados no patrimonio histórico vitivinícola europeo e patrimonio histórico-artístico de Galicia). No recinto alberga dous hórreos de gran capacidade e cruceiro do século XVIII, pombal, capela cuxa pila bautismal se remonta ao século XVI e fontes ornamentais. Pero sen dúbida o elemento máis destacado é o seu xardín con máis de 850 clases de camelias e especies exóticas. Trátase dun espazo ornamental cun gran interese botánico, digno en varias ocasións da Camelia de Ouro de S.M a Raíña. Este enclave tamén ten importancia na historia máis recente de Galicia e que nel se fraguou a reforma do actual Estatuto de Autonomía de Galicia, a clausura do I Congreso de Poesía Galega e pecháronse as xornadas Europeas de Inventario do Patrimonio Vitivinícola Europeo PATRIVIT. Entre os personaxes do mundo da cultura que percorreron os xardíns de Quinteiro da Cruz, cabe destacar escritores como Manuel María (que dedicou fermosos sonetos), Uxío Novoneira, Bernardino Graña, Filgueira Valverde, Camilo José Cela, Alfredo Conde, Nélida Piñón, pintores como Laxeiro, Ruibal, Conde Corbal, Xurxo Alonso, Chaves, Miguel Piñeiro, científicos como Santiago Grisolía e Gregorio Varela, o director de cine Garci ou o escultor Ramón Conde entre outros."

Para saber máis

As camelias proceden de países tan lonxanos de Galicia como son China e Xapón, chegaron a finais do século XVIII. Nun principio formaron parte dos pazos e casas señoriais da nobreza galega, pero co tempo introducíronse nos xardíns e fincas de toda a xeografía, ata converter Galicia nun referente internacional no cultivo e produción desta planta. O xénero Camellia inclúe moitas plantas ornamentais incluíndo a planta do té. En Galicia, sobre todo nas Rías Baixas, é moi cultivada como especie ornamental grazas aos seus solos ácidos e a súa climatoloxía que favorecen o seu cultivo e inducen unha longa floración. Grazas á hibridación natural destas plantas nos xardíns foron creándose novas variedades chegando ás 8000 actuais. O feito de atoparse maiormente en pazos e casas señoriais que dispoñen de grandes xardíns fai que sexa un pracer camiñar por eles observando as distintas variedades. Así en Galicia nace a Ruta da Camelia. É un percorrido proposto por pazos singulares, repartidos entre A Coruña e Pontevedra, onde se atopan os xardíns máis espectaculares. O mellor momento para emprender esta ruta é a partir de febreiro xa que é cando comeza a floración desta vistosa flor da camelia. En Ribadumia atópase o Pazo Quinteiro, pertencente a esta Ruta da Camelia, onde, ademais de degustar un bo viño albariño de colleita propia, pódense ver florecer as máis de 5000 camelias de 1500 variedades diferentes. Das cales destacan catro, a japónica, a reticulata e a higo. Esta última premiada coa Camelia de Ouro no Concurso Internacional dedicado a este arbusto.

Para coñecelo mellor

Na parroquia de Lois, pertencente ao municipio pontevedrés de Ribadumia, atópase o Pazo Quinteiro da Cruz. Esta casa señorial conta cunha adega propia na que elaboran o seu propio viño Albariño Rías Baixas. O edificio data do século XVIII e conta cun estilo neoclásico. O exterior do pazo destaca por dispoñer dun alpendre ou cuberta porticada, dous hórreos e un cruceiro do século XVIII. Ademais, o seu xardín -recentemente declarado de Excelencia Internacional- conta con especies como camelias, un pombal, unha capela e fontes ornamentais. De feito, o pazo pode ser visitado todos os días do ano. A través do percorrido polas súas instalacións poderemos espertar todos os nosos sentidos e aprender sobre as máis de 500 especies diferentes de árbores e arbustos e máis de 5.000 árbores de camelias. Ribadumia é un municipio da provincia de Pontevedra, localizado no corazón do Val do Salnés. Limita cos municipios de Vilanova de Arousa, Cambados, Meaño e Meis. O nome do municipio procede do río que o atravesa, o Umia.