Marín. Estaleiros e porto. Centro de formación en embarcacións

Marín

Sobre este patrimonio

Marín é distrito Marítimo de Primeira Clase desde 1868 e dispón do servizo de numerosos consulados europeos e sudamericanos debido ao importante movemento comercial e migratorio. Posúe unha gran baía que se estende desde Punta Pesqueira ata Placeres e a súa importancia como vía de comunicación marítima vén da época romana. A ría de Pontevedra inicia o seu despegue comercial e industrial a mediados do século XVIII, por entón, instálanse na zona industrias do salgazón e conserveiras ademais doutras actividades relacionadas co mar. Marín tamén foi punto de partida do movemento migratorio cara ás novas rutas de América, a compañía Trasatlántica tiña un servizo de ida e volta a Montevideo e Bos Aires o día 2 de cada mes.En 1883 o Concello de Pontevedra solicita que o Porto de Marín sexa considerado porto de Interese xeral, cousa que sucede o 30 de agosto de 1886.No porto de Marín tamén ten a súa sede o Centro de Formación A Aixola un centro dependente da Consellería do Mar e xestionado polo Centro Tecnolóxico do Mar-Fundación CETMARD. Foi creado no ano 1997 e a súa actividade está dirixida a persoas que se atopan en situación de desemprego e que queren seguir traballando noutros oficios relacionados co sector mariño.O porto de Marín conta con estaleiros nos que se levan a cabo traballos relacionados coa construción, botadura e entrega de buques. Tamén ten importancia as seccións destinadas ás tarefas de modernización, reparación e mantemento naval.

Para saber máis

O porto de Marín dispón de gran variedade de servizos e instalacións como por exemplo, unha moderna lonxa dotada de sala de exposición e venda, unha terminal cuberta de iniciativa privada que permite realizar as tarefas de carga e descarga todos os días do ano e que é unha infraestrutura pioneira en España. O porto tamén dispón de 7000 m. de vías ferroviarias que permiten a carga e descarga en primeira liña de peiraos.O porto de Marín, tamén é porto de entrada de mercadorías procedentes de países terceiros polo que conta cun posto de inspección fronteiriza que dota aos técnicos de Sanidade e Exterior e Sanidade Animal e Vegetal dos medios necesarios para realizar controis de calidade. O porto de Marín dispón de máis de 100.000 metros cadrados de explanada como terminal de contedores, con 500 metros de liña de atraque e 14 de calado. Esta terminal está conectada á principal rede ferroviaria do país. Tamén conta cunha zona de lavado e reparación de contedores.Ademais dos servizos xa comentados, o porto conta cunha Terminal de grans agroalimentarios, unha terminal de froita, Frigoríficos e outra serie de infraestruturas como estaleiros, varadoiros, fábricas de xeo, subministración de combustible, etc.Pola súa parte, o centro de formación en embarcacións, ofrece aos seus alumnos distintas áreas de traballo como a área de Composites na que se manexa poliéster e distintos tipos de fibras, unha área da Madeira, área de veleiría, área de redes, etc.

Para coñecelo mellor

No concello de Marín destaca o estaleiro NODOSA que, desde o ano 1982 non fixo outra cousa que medrar e proporcionar máis servizo. Esta empresa encárgase de construír e reparar buques, aínda que de forma paralela, tamén traballa como obradoiro mecánico. Por outra banda, tamén relacionado co sector do mar, Marín conta desde o ano 1997 co Centro de Formación A Aixola", que se considera todo un referente para oficios do sector mariño. Marín era coñecido como San Xiao de Ancorados debido aos barcos que fondeaban ao seu redor. Este municipio mariñeiro pertence á provincia de Pontevedra e está situado nas Rías Baixas, máis concretamente na Ría de Pontevedra. Grazas á súa situación, o porto de Marín conta con produtos mariños de calidade como cigalas, linguados, robalizas, rodaballos, chocos, polbos, sardiñas, centolas, nécoras ou ameixas, entre outros."